Kupa szumu zrobioło sie skuli meczu Piotrówki z Jemielnicom. To boł szpil z tych, co to "choby slecieć, ale tyn muszymy wygrać". Szpil tyn wygrała Piotrówka i to konkretnie, bo aż 7-2, ale podokryng Strzelce prziznoł Jemielnicy walkower, bo Piotrówka wystawioła we składzie chopa, co w rezerwie nie mog grać. Piotrówka sie z tym nie zgodzioła i napisała odwołanie do Opola, ale na razie do tabeli wpisujymy walkower. Tak przi okazji je to bardzo ciekawe, że dwóch chopa patrzi na tym som regulamin, czyto tyn som paragraf i jedyn godo, że je tak, a drugi, że je inaczyj. No to jak? jedyn z nich je gupi i nie umiy czytać? Abo regulamin je do niczego, bo kożdy z niego może wyczytać, co chce? Że w podokryngu dowajom walkower, a potym w Opolu go cofajom - i to wszystko w oparciu ło te same paragrafy.

Tak czy inaczej, Jemielnica mo tera 10 punktów przewagi nad Piotrówkom i praktycznie awans mo już w kieszyni i na jesiyń zaś zagro w drugiyj lidze od końca, w tyj, kaj durch grała.

W grupie drugiyj coroz bliżyj awansu je rezerwa Piasta. Szczelecko jedynastka niy mo tak srogiyj przewagi, jak Jemielnica, ale i tak mo 5 punktów nad Jaryszowym, a 6 nad Kadłubcym i Mokrymi Łanoma. I ino te trzi manszafty mogom jeszcze Piasta dogonić, ale w praktyce bydzie to bardzo trudne.

W grupie trzeciej ło awans piere sie Krympna i Racławiczki. Na razie na liderze som Racławiczki, ale Krympna traci ino jedyn punkt i tukej do konca nie bydzie wiadomo, wto wywalczy awans. Inksze drużyny w tyj grupie szans na awans już nie majom.