LZS II PIOTRÓWKA - LZS JEMIELNICA 7-2 (1-0)

1-0 20min. Wons
2-0 55min. Ilnicki (karny)
3-0 60min. Hejduk
4-0 63min. Emeka
4-1 67min. Grochla
5-1 74min. Obaka
6-1 82min. Babatunde
6-2 86min. Bombelka
7-2 88min. Obaka

Piotrówka: Nikołajczyk - Jagła, Shereni, Grolik, Lechowicz (Kołodziej),  Obaka, Wons, Ilnicki (Dziewior), Hejduk (Kusidło), Emeka (Cisse), Babatunde
Jemielnica: Szłapa - Rupacz, Wiechoczek, Kalisz, Bombelka, Jaskóła, Meinhardt (Mateja), Korczak, Pyka, Grochla, Chodam

Nojważniejszy mecz szczeleckiej bundesligi momy już za sobom. Piotrówka gładko ograła Jemielnica 7-2, ale wiela godki sie po tym meczu zaczono, to jeszcze na dugo starczy. Coby nie pedzieć, boło na co patrzeć, a jak wto lubi oglondać gole, na pewno nie żałuje, że wybroł się na tyn szpil.

Piyrszo połowa boła dość wyrównano, ale Jemielnica grała z wiatrym i to dowało jyj dość srogie fory. Mimo dobrego wiatru, Jemielnica nie poradzioła z niego skorzystać, a wiyncyj z gry miała Piotrówka. Jemielnica starała sie grać z kontry, ale Piotrówka dobrze pilnowała swojej bramki. Piyrszy gol wlecioł w 20 minucie po szczale Wonsa. Bal po drodze otar się jeszcze od jednego z obrońców i wlecioł do bramki Jemielnicy. Tak Piotrówka wyszła na prowadzynie. Jemielnica mogła niedugo po tym wyrównać, ale nie szczeloła karnego i do przerwy boło 1-0.

Po przerwie wiatru dostała Piotrówka. I wtedy sie zaczło. Drugo połowa to taki szpil do jednyj bramki, a Piotrówka praktycznie durch siedziała na połowie Jemielnicy. Dziesiyńć minut po przerwie Piotrówka dostała elwra i w przeciwiyństwie do Jemielnicy go szczeloła i zrobioło się zwei zu null. Niedugo potym Hejduk szczeloł na 3-0, a potym boło już 4-0 i zrobioło się po szpilu. W 67minucie Grochal szczeloł na 4-1, ale to już boła musztarda po obiedzie. Piotrówka wyraźnie przewożała i do końca trefioła jeszcze trzi razy do bramki Jemielnicy, na co Jemielnica odpedziała ino jednym golym. Dziesiyńć minut przed końcym Piotrówka miała drugiego elwra, ale tym razym go nie wykorzystała i łostatecznie mecz sie skończoł srogim wynikiym 7-2.

Po wygranyj Piotrówka je dalyj drugo w tabeli, ale traci do Jemielnicy ino jedyn punkt. Po meczu zaczło się godanie, że Jemielnica by nie przegrała, jakby w Piotrówce nie grały murziny, abo jakby Piotrówka grała richtich rezerwom. Tego szło sie spodzioć, bo wtoby nie przegroł, znodby coś na swoje usprawiedliwiynie. Piotrówka mo w bundeslidze swoja rezerwa i jyj świynte prawo wstawić tam chopa z piyrszego składu, jak się w  w nim nie mieści. Świynte tyż prawo ekstra go nie wystawić w piyrszym składzie, coby mog grać w rezerwie. Świynto tyż prowda, że Jemielnicy trocha żol, że nie mo IV ligi, ale tyż i trocha prawie majom, że to nie boły takie derby, jak za downiyj piyrwyj z Piotrówkom, kiedy grali sami swoi.

Mimo to, coś jednak z tego łostało. To boł szpil, ło wtorym sie tera nojwiyncyj godo, a dugo jeszcze bydzie wspominać. Niewtorzy godajom, że po co w jednyj gminie dwa kluby, że styknie ino jedyn. I nie majom racji, jakby tak miało być, to nie bołoby takich szpilów jak tyn. I wszyscy wiymy, na czym stoi Piotrówka. I wszyscy jyj konsek zowiścimy. I wszyscy wiymy, że pryndzyj abo później to sie skończy, ale dzisiej mogymy sie wszyscy pochwolić, że momy u siebie (abo bardzo blisko) ferajna, co wszystkim naobkoło smaruje. I że tako mało Piotrówka tak fest miyszo Oderce Opole. I lepiyj, że robi to uczciwie, a nie jak np. klub z Opola, wtory wcisnoł sie do ligi i z kuli wtorego sztyry majnszafty musiały slecieć, coby mu zrobić miejsce.