No i doczekali my sie. Szczelecko bundeliga dała sie do granio. Na piyrszy łogiyń poszoł szpil Jemielnicy z Kalinowym. Jemielnica je na liderze, bez cołko jesiyń stracioła ino 5 bramek i coroz bardziyj zaczyno wierzyć, że tym razym awand do "Serie A" sie udo. Tym bardziyj wszyscy byli ciekawi piyrszego szpilu, coby zmiarkować, jak drużyna wyglondo po zimowyj przerwie. No i okazało się, że całkiym dobrze. Jemielnica wygrała z Kalinowym 4-0 i pokozała, że dalyj je w dobryj formie.

Nojwiynkszy rywal Jemielnicy, Piotrówka grała tyż u siebie, ale ze Spórokiym. Piotrówka mo sztyry punkty straty do Jemielnicy i choć to ino je rezerwa Piotrówki, to tu tyż żodyn awansu odpuścić nie chce. Spórok wiela do pedzynio w Piotrówce niy mioł i przerżnoł gładko 7-0. I tera w tabeli momy taki układ, że Piotrówka do Jemielnicy dalyj traci 4 punkty, ale mo tyż 4 punkty przewagi nad Kadłubym, bo Kadłub ino zrymisowoł z Rożniontowym. We Kadłubie goli boło fest, bo aż 6, ino że kożdy manszaft szczeloł po trzi, kożdy ugroł jedyn punkt, a jedyn poszoł w luft.

We inkszych szpilach Grodzisko wygrało we Krośnicy "ajnc cu nul", tak samo Staniszcze ograły na wyjeździe Szymiszów, a Kielcza przegrała w Izbicku. We tabeli Krośnica i Rożniontów som na samym końcu i tracom już fest dużo punktów, ale to i tak ostatnio liga, wiync niy ma już kaj slecieć, a na szpicy Jemielnica i Piotrówka. W nojbliższyj kolyjce momy szpil chyba rundy, bo w Piotrówce zamelduje sie Jemielnica i jak nie chce mieć gorkiyj wiosny, to musi w Piotrówce wygrać.