Nareszcie tabela IV ligi wyglondo tak, jak powinna. I to z dwóch powodów. Po piyrsze, wszyskie drużyny rozegrały wszystkie zaległości i terozki widać czorno na biołym, kto jak stoi, a po drugie, na szpicy som ci, co być tam powinni: po piyrwsze Polonia Bytom, po drugie Odra Opole i po trzecie Ruch Zdzieszowice. Na tako tabela to aż fajnie sie patrzi. Szkoda ino, że to nie je I l iga. Nojbliższo kolyjka może wyglond tabeli jeszcze poprawić.

Bytom gro ze Skalnikiym i niy ma czarów, tu Polonia musi wysoko wygrać. Mogom być srogie baty, a jakby sie Skalnikowi udało zrymisować abo wygrać, to bołaby to synsacja miesionca. Srogie baty mogom być tyż w Opolu, kaj na mecz wybiyro sie Malapana. Manszaft z Łozimka nie poradzi sie dać rady w tyj lidze i mo dopiyro 6 punktów. W Łopolu niy mo wiynkszych szans, bo roz że Łodra je zwyczajnie mocniejszo, a na dodatek je jeszcza na fali po 6-1 we Łaziskach. No i miano wicelidera tyż swoje robi. Tak, że podobnie jak w przipadku Bytomia, tukej tyż wszystko inksze niż srogie zwyciynstwo Łodry bydzie niespodziankom.

Na trzecie smary mogymy liczyć w Zdzieszowicach. Tam Ruch zagro ze Swornicom  i tyż musiołby wysoko wygrać. We środa Ruch mało co nie wygroł z Bytomiem, wskoczoł na czworte miejsce i tyż zdowo sie dostować szwongu. Swornica może nie mieć leko w Zdzieszowicach i musi sie liczyć ze srogim wynikiem.

W inkszych szpilach tak lekko choby na uboczu momy mecz Stali Bielsko z Górnikym. Stal mo ino 4 punkty wiyncyj jak Górnik, i s kuli tego wynik tego meczu nie je tak oczywisty, jak poprzednich trzech, ale i tak Stal powinna wygrać, a zrobić to musi, jak nie chce wylecieć ze szpicy. Dopiyro do do niyj doszlusowała i gupio by boło zaś stracić z niom kontakt. Górnik i tak przeca na awans nie pódzie, a slecieć na razie tyż nie sleci. Wypadało by, coby trzi punkty łostały w Bielsku.

No dobra, jadymy dalyj. Jastrzymbie jedzie na mecz do Pawłowic i zdowo się, co nie straci tam punktów. Wygrać swoje szpile by musiały tyż Skra i Rekord i cosik sie widzi, że to by boły wszystkie manszafty, wtore bydom rzondzić a lidze. Reszta bydzie sie abo bronić przed spadkiym, abo pilnować, coby nie wylecieć za bardzo ze środka tabeli. Tu jeszcze Szombierki mogłyby mieć co wiyncyj do pedzynia, ale jak na razie to Szombierki barzyj patrzom, coby nie wdepnonć do strefy spadkowej niż namiyszać we szpicy.

Na spodku tabeli momy już 4 drużyny, co dość mocno łodstajom od reszty. Skalnik i Malapana raczyj swojyj pozycji po tyj kolyjce nie poprawiom, a Podbeskidzie i Piast zagrajom ze sobom, taki choby mecz na łobroconej szpicy - wto go wygro, może trocha we tabeli sztajgnonć, gorzyj bydzie jak zremisujom, wtedy obie drużyny na dobre ostanom na spodku.