Kto dogoni Bytom? Na to pytanie nie ma dziś odpowiedzi. Lider nie oglondo sie na reszta i pilnuje ino, coby na boisku szczelić wiyncyj goli, co przeciwnik i jak na razie blank dobrze mu to idzie. Wczoraj Polonia grała z Grunwaldem i wygrała 3-1. Trzi punkty zaś poszły na konto Bytomia, a jego przewaga nad drugom w tabeli Skrom je aż 6 punktów. Wyglondo na to, że na Polonianiy ma mocnych.

Skra Czynstochowa tyż swój szpil wygrała, tyż 3-1, ze Górnikiym Wesoła. Mo tyla samo punktów, co Stal Bielsko, ale tyż wygrany z Bielskiym mecz i bez toż Skra je we tabeli drugo, a Stal trzecio. Stal Bielsko pokozała wczora Skalinkowi Gracze, jak sie gro. Skalnik wtorbioł we Bielsku aż 6-0 i doprowdy nie bydzie mioł wiela do godanio w tyj lidze. Bydzie raczyj musioł pilnować, coby nie stracić setki, a i o to bydzie mu bardzo trudno, bo liga je dugo i meczów jeszcze co niemiara, a Skalnik i tak już stracioł 30 goli.

Stal Bielsko kryza mo chyba już za sobom, a o trefnym poczontku sezonu chyba już żodyn w Bielsku nie pamiynto. Wszystko idzie już jak sie noleży i kiejby nie tyn Bytom, to bołoby już całkiym fajnie. Cołkiym fajnie to majom w Jastrzymbiu. Tam o awansie nie myślom, a plan je taki, coby sie utrzimać - dyć Jastrzymbie to beniminek. I plan tyn na razie realizujom bez zarzutu, Jastrzymbie wygrało w Bytomiu z Szombierkami 3-1 i je w tabeli czworte. Jak na beniaminka - rewelacja.

Smutne miny majom za to w Opolu. Odra zrymisowała u siebie z Czańcym 2-2 i stracioła na tym dwa punkty. Ambicje w Opolu mieli wiynksze, mieli nadzieja, że po spadku szybko nazod wlezom do III ligi, a tu okazuje się, że nie bydzie z tym wcale tak leko, i to nie ino s kluli Bytomia. Choć wto wiy, Odra mo jedyn mecz zaległy i jak go wygro, bydzie drugo i jakby nie ta Polonia, to szłoby jednak o awansie myśleć. A tak, klops z marmeladom i przystanek w IV lidze zapowiado sie na trocha dugszy, niż w Opolu by chcieli.

Punkty zaczynajom zdobywać w Zdziesowicach. Ruch trocha nie nojlepiej zaczon sezon, ale tera sie już poprawioł i wczoraj wygroł z Rekordym Bielsko aż 4-1. To piyrsze tak wyraźne zwyciynstwo Ruchu w tym sezonie i na pewno pozwoli się Zdzichom lepiyj poczuć. Ruch przeskoczoł Rekord w tabeli o 1 punkt i je tera ósmy.

We inkszych meczach Pniówek wygroł ze Swornicom Czarnowonsy 4-0, czym zepchnoł Swornica do strefy spadkowyj, rezerwa Górnika zrymisowała dość szczynśliwie z Malapanom 2-2 i tukej to momy ciekawostka. Malapana prowadzioła już 2-0 i zaniosioło sie na drugo wygrana manszaftu z Ozimka, ale Górnik we ostatnich minutach szczeloł dwie bamki i uratowoł rymis. Rymis tyn jeszcze roz stanoł pod znakiym zapytania w doliczonym już czasie, bo Malapana dostała elwra, ale ku rozpaczy kibiców z Ozimka tego elwra nie szczeloła i 2-2 ostało. Je to dopiyro szósty punkt beniaminka z Ozimka i rymisym tym wiela swojyj pozycji nie poprawioł.